LLANQUINAO LLANQUINAO GABRIEL GONZALO

Title:KAWIÑTUMERKI GA TI GÜRÜ WENU MAPU MEW
Subject:POETRY
Speaker:LLANQUINAO LLANQUINAO GABRIEL GONZALO
Scarica il testo


Gabriel Gonzalo Llanquinao Llanquinao
KAWIÑTUMERKI GA TI GÜRÜ WENU MAPU MEW

Kiñen antü may, ruparkey ti mañke
Fey perkefi ti Pagi: mari mari maje,
Müley may ta kiñe xawün wenu mapu mew
Amuafuyu, pigerkey chi Pagi.
Feley may amuayu ka, pirkey chi Pagi.

Fey ga amulelu rüpü mew chi Pagi perkefi ta gürü
Mari mari anay gürü, chumlefuymi am:
Müley may ta kiñe xawün pigen, welu nielan ta kompañ
Amuafuyu, chem pileymi chemay
Kümelkalen ta ti maje, amuayu ka pirkey chi gürü

Fey amurkey chi Pagi egu ta gürü
Fey amulelu egu, ti Pagi feypirkefi ti gürü
Küme miyawaymi, pekan gojiküwlaaymi, pirkefi
Feman ta ti maje, gojikünüwlayan

Femechi puwürkigu ti xawün mew
Fey chi xawün mew mülerkey ti fij üñüm:
Xegka, kanin, ñamku, rawijma
Femechi fey poyegerkeygu: gürü egu Pagi,
Fey ga ti gürü pütokorkiy chi pulku

Femechi rupalu chi antü,
Puwürki ñi amutuael chi pu magel
Welu ga ti gürü gojipurkey
Pepi wüxawerkelay ti gürü

Amutuaymi ka gürü pigerkey
Amutuan ta ti pirkey chi gürü
Fey ga püñamtulgerkey ta foki
Femechi fey xarikünugerkey chi gürü
Ñi wiñotuam ñi mapu mew

Femechi narümgepaturkey chi gürü
Fey ga petu narümgepatulu, ramtugerkey:
Puwi mi am, pigerkey chi gürü
Feyti gürü, fey petu puwlan, pirkey

Ka püñamtulgerkey ga foki
Fey ka ramtugerkey chi gürü
Puwimi am pigerkey
Fey eja ajküñmagerkiy ñi zugun
Peeetu puuuwlaaan pirkey chi gürü



Fey ka püñamtulgey foki
Fey ka ramtugey:
Fey ajküngerkelay ti gürü ñi zugun

Femechi fey ti pu üñüm feypirkey
Puwperkelay pirkigün,
Fey fane fanetugerkey
Fey fanewerkelay ti gürü
Fey neykümkünugerkey

Femechi ti gürü petu akurkelafuy ta mapu mew
Femechi fey üxüfnaqparkey
Fey ga pawküparkey ñi logko ti gürü
Fey xanalewerkey ti gürü kiñe rüpü mew

Fey ruparkey ti rüpü mew kiñe mara
Chumi am tüfa chi gürü pirkey
Fey ti gürü ajfürkey ñi logko
Fey yegerkey kiñe machi mu

Femechi ti gürü machitugerkey
Femechi petu machitugelu,
Ñochike chi newülürkley ti gürü
Femechi ñochike chi newenkonturkey ti gürü
Fey femechi rumel mogelewerpuy ta gürü

Afi


...

  • Libri.it

  • Libri.it